Nga Puritani James Smith (1802-1864)

“ajo është e lirë të martohet me cilin të dojë, veçse kjo punë të bëhet në Zotin.” 1 Korintasve 7:39

Miq në moshë të re, a rrëfeni se besoni në Krishtin? Nëse është kështu, kini kujdes se çfarë lidhjesh martesore formoni. Mos pranoni kurrë të martoheni me dikë në kundërshtim me urdhëresat e qarta të Fjalës së shenjtë të Perëndisë. Mbani mend, ishin martesat e përziera midis shenjtorëve dhe mëkatarëve—të cilat sollën përmbytjen! Ishin martesat e përziera që u sollën shumë vuajtje hebrenjve pas kthimit të tyre nga robëria babilonase. Ishte një martesë e tillë që solli të gjitha telashet e Samsonit mbi të; dhe ishte martesa me gra të pakthyera që largoi zemrën e Solomonit nga Zoti. Burrat më të fortë dhe më të mençur u mposhtën kështu, dhe prandaj ju duhet të jeni të kujdesshëm.

Mendoni për efektet e saj mbi përshpirtshmërinë tuaj—për pasojat për fëmijët tuaj—për përshtypjen e keqe që bën në botë—dhe për dëmin që sjell në kishë. Është një nga kurthet kryesore të Satanit—një nga mjetet e tij më të fuqishme; prandaj ruhuni nga ajo!

Vendoseni në mendjet tuaja; vendosni, me fuqinë e Zotit, që kurrë nuk do t’i nënshtroheni këtij tundimi—të jeni në një lidhje me një jobesimtar. Një njeriu që ka një njohuri të mirë të historisë së kishës së Zotit që nga fillimi, do t’i duhej krahu i një engjëlli dhe intelekti i një kryeengjëlli—për të shkruar të gjitha dëmet, mjerimin dhe mëkatin, që ka ardhur nga martesat e përziera e besimtarëve dhe jobesimtarëve! Nëse një libër i tillë voluminoz do të shkruhej, do të duhej më shumë se një jetë për t’a lexuar atë. Por është shkruar dhe do të lexohet. Sepse kur koha nuk do të ekzistojë më—kur do të jetë tepër vonë për të korrigjuar gabimin ose për të bërë ndryshime për gabimet tona—ne do të shohim, në dritën më të qartë, se cilat kanë qenë pasojat e tmerrshme të lidhjeve të tilla të papastra.

Nëse ndonjëri nga lexuesit e mi ka rënë në kurth, rrëfejeni mëkatin tuaj para Perëndisë, ecni me përulësi para Tij, pranoni ndëshkimin e paudhësisë tuaj dhe përpiquni të paralajmëroni dhe të ndaloni të tjerët nga rënia në një kurth kaq fatal! Kam parë shumë martesa të tilla në pesëdhjetë vitet e fundit—por kurrë nuk pashë një që të dilte të ishte e lumtur, e shenjtë, ose për përfitimin e vërtetë të palëve. Por kam dëgjuar rrëfimin e zemrës së thyer, kam parë lotët e nxehtë që rrjedhin nga syri që qan, dhe kam vërejtur efektet e zymta të një mosbindjeje të tillë ndaj orakujve Hyjnorë, në një varietet mënyrash.

Imagjono sikur je gati të këpusësh një trëndafil—por ka një akrep nën gjethet e tij! Ti mund të mendosh se je gati të pish një kupë nektari—por ka helm në atë kupë! Ti në mënyrë të marrë mund të mendosh se rasti yt do të jetë një përjashtim nga rregulli i përgjithshëm—por ai nuk është! Perëndia është i vërtetë; Fjala e tij duhet të përmbushet; dhe çdo epokë ka dëshmuar për faktin se “rruga e shkelësve është e vështirë.” Është e vështirë—por kush mund të thotë se sa e vështirë është, pasi hidhërimet më të hidhura, dhimbjet më të mprehta, vuajtjet më të forta dhe keqardhja më agonizuese janë duruar në fshehtësi!